har lamha agar gurez paa hai

Har lamha agar gurez-paa hai Too kyuun mire dil men bas gaya hai Chilman men gulaab sanbhal raha hai Ye too hai ki shokhee-e-sabaa hai Jhuktee nazren bataa rahi hain Mere liye too bhee sochtaa hai Main tere kahe se chup hoon lekin Chup bhee too bayaan-e-mudda.aa hai Har des kee apnee apnee bolee Sahraa kaa sukoot bhee sadaa hai Ik 'umr ke baa'd muskuraa kar Too ne to mujhe rulaa diyaa hai Us vaqt kaa hisaab kya duun Jo tere baghair kaT gaya hai Maazee kee sunaa.oon kya kahaanee Lamha lamha guzar gaya hai Mat maang du'aa.en jab mohabbat Teraa meraa mu'aamla hai Ab tujh se jo rabt hai to itnaa Teraa hee khuda miraa khuda hai Rone ko ab ashk bhee naheen hain Yaa 'ishq ko sabr aa gaya hai Ab kis kee talaash men hain jhonke Main ne to diyaa bujhaa diyaa hai Kuch khel naheen hai 'ishq karnaa Ye zindagee bhar kaa rat-jagaa hai