jab bhi aankhon men tirii rukhsat kaa manzar aa gaya

Jab bhee aankhon men tiree rukhsat kaa manzar aa gaya Aaftaab-e-vaqt neze ke baraabar aa gaya Dostee kee jab duhaa.ee dee to sharq-o-gharb se Haath men patthar liye yaaron kaa lashkar aa gaya Is safar men go tamaazat to bahut thee hijr kee Main tiree yaadon kee Chaaon sar pe le kar aa gaya Go zameen-o-aasmaan masroof-e-gardish hain magar Jab bhee gardish kaa sabab sochaa to chakkar aa gaya Aadmee ko hashr ke manzar nazar aane lage Us ke qabze men jab ik zarre kaa jauhar aa gaya Husn-e-insaan dafn ho jaane se miTtaa hai kahaan Phuul ban kar khaak ke parde se baahar aa gaya Ashk jab Tapke kisee bekas kee aankhon se 'nadeem' Yuun lagaa toofaan kee zad men samundar aa gaya