jo log dushman e jaan the vahii sahaare the
— Ahmad Nadeem Qasmi
Jo log dushman-e-jaan the vahee sahaare the
Munaafe the mohabbat men ne khasaare the
Huzoor-e-shaah bas itnaa hee arz karnaa hai
Jo ikhtiyaar tumhaare the haq hamaare the
Ye aur baat bahaaren gurez-paa nikleen
Gulon ke ham ne to sadqe bahut utaare the
Khuda kare ki tiree umr men gine jaa.en
Wo din jo ham ne tire hijr men guzaare the
Ab izn ho to tiree zulf men piro den phuul
Ki aasmaan ke sitaare to isti.aare the
Qareeb aa.e to har gul thaa khaana-e-zamboor
'nadeem' duur ke manzar to pyaare pyaare the