kahiin wo meri mohabbat men ghul raha hi na ho

Kaheen wo meree mohabbat men ghul raha hee na ho Khuda kare use ye tajraba huaa hee na ho Supurdagee miraa me.aar to nahin lekin Main sochtaa hoon tire ruup men khuda hee na ho Main tujh ko paa ke bhee kis shakhs kee talaash men hoon Mire khayaal men koi tire sivaa hee na ho Wo uzr kar ki mire dil ko bhee yaqeen aa.e Wo giit gaa ki jo main ne kabhi sunaa hee na ho Wo baat kar jise phailaa ke main ghazal kah luun Sunaa.oon sher jo main ne abhee likhaa hee na ho Sahar ko dil kee taraf ye dhuaan saa kaisaa hai Kaheen ye meraa diyaa raat-bhar jalaa hee na ho Ho kaise jabr-e-mashiyat ko is duaa kaa lihaaz Jo ek baar mile phir kabhi judaa hee na ho Ye abr-o-kisht kee Dunya men kaise mumkin hai Ki umr-bhar kee wafa kaa koi sila hee na ho Miree nigaah men wo peD bhee hai bad-kirdaar Ladaa huaa ho jo phal se magar jhukaa hee na ho Jo dasht dasht se phoolon kee bhiik maangtaa thaa Kaheen wo toD ke kashkol mar gaya hee na ho Tuloo-e-sub.h ne chamkaa diye hain abr ke chaak 'nadeem' ye miraa daamaan-e-mudda.aa hee na ho