khadaa thaa kab se zameen piith par uthaae hue

KhaDaa thaa kab se zameen piiTh par uThaa.e hue Aab aadmee hai qayaamat se lau lagaa.e hue Ye dasht se umaD aayaa hai kis kaa sail-e-junoon Ki husn-e-shahr khaDaa hai naqaab uThaa.e hue Ye bhed tere sivaa ai khuda kise maaloom Azaab Toot paDe mujh pe kis ke laa.e hue Ye sail-e-aab na thaa zalzala thaa paanee kaa Bikhar bikhar ga.e qarye mire basaa.e hue Ajab tazaad men kaaTaa hai zindagee kaa safar Labon pe pyaas thee baadal the sar pe chhaa.e hue Sahar huee to koee apne ghar men ruk na sakaa Kisee ko yaad na aa.e diye jalaa.e hue Khuda kee shaan ki munkir hain aadamiyyat ke Khud apnee sukDee huee zaat ke sataa.e hue Jo aasteen chaDhaa.en bhee muskuraa.en bhee Wo log hain mire barson ke aazmaa.e hue Ye inqilaab to ta.ameer ke mizaaj men hai Giraa.e jaate hain aivaan bane-banaa.e hue Ye aur baat mire bas men thee na guunj is kee Mujhe to muddaten guzreen ye giit gaa.e hue Miree hee god men kyuun kaT ke gir paDe hain 'nadeem' Abhee duaa ke liye the jo haath uThaa.e hue