main hoon yaa tuu hai khud apne se gurezaan jaise
— Ahmad Nadeem Qasmi
Main hoon yaa too hai khud apne se gurezaan jaise
Mare aage koi saaya hai khiraamaan jaise
Tujh se pahle to bahaaron kaa ye andaaz na thaa
Phuul yuun khilte hain jaltaa ho gulistaan jaise
Yuun tiree yaad se hota hai ujaalaa dil men
Chaandnee men chamak uThtaa hai bayaabaan jaise
Dil men raushan hain abhee tak tire va.adon kaa charaagh
TooTtee raat ke taare hon farozaan jaise
Tujhe paane kee tamannaa tujhe khone kaa yaqeen
Tere gesoo mire maahaul men ghaltaan jaise
Vaqt badlaa pa na badlaa miraa me.aar-e-wafa
Aandhiyon men sar-e-kohsaar charaaghaan jaise
Ashk aankhon men chamakte hain tabassum ban kar
Aa gaya haath tiraa gosha-e-daamaan jaise
Tujh se mil kar bhee tamannaa hai ki tujh se miltaa
Pyaar ke ba.ad bhee lab rahte hain larzaan jaise
Bharee Dunya men nazar aataa hoon tanhaa tanhaa
Margh-zaaron men koi qarya-e-veeraan jaise
Gham-e-jaanaan gham-e-dauraan kee taraf yuun aayaa
Jaanib-e-shahr chale dukhtar-e-dahqaan jaise
Asr-e-haazir ko sunaataa hoon is andaaz men sher
Mausam-e-gul ho mazaaron pe gul-afshaan jaise
Zakhm bhartaa hai zamaana magar is tarah 'nadeem'
See raha ho koi phoolon ke garebaan jaise