meri mahduud basaarat kaa natiija niklaa

Meree mahdood basaarat kaa nateeja niklaa Aasmaan mere tasavvur se bhee halkaa niklaa Roz-e-avval se hai fitrat kaa raqeeb aadam-zaad Dhoop niklee to mire jism se saaya niklaa Sar-e-Dariya thaa charaaghaan ki ajal raqs men thee Bulbulaa jab koee TuuTaa to sharaaraa niklaa Baat jab thee ki sar-e-shaam farozaan hota Raat jab khatm huee sub.h kaa taaraa niklaa Muddaton ba.ad jo royaa hoon to ye sochtaa hoon Aaj to seena-e-sahraa se bhee Dariya niklaa Kuch na thaa Kuch bhee na thaa jab mire aasaar khude Ek dil thaa so ka.ee jagah se TuuTaa niklaa Log shahpaara-e-yak-jaa.ee jise samjhe the Apnee khalvat se jo niklaa to bikhartaa niklaa Meraa eesaar mire zo.am men be-ajr na thaa Aur main apnee adaalat men bhee jhooTaa niklaa Main to samjhaa thaa bahut sard hai zaahid kaa mizaaj Us ke andar to qayaamat kaa tamaasha niklaa Vahee be-ant khalaa hai vahee be-samt safar Meraa ghar mere liye aalam-e-baalaa niklaa Zindagee ret ke zarraat kee gintee thee 'nadeem' Kya sitam hai ki adam bhee vahee sahraa niklaa