phir bhayaanak tiirgii men aa gae

Phir bhayaanak teergee men aa ga.e Ham gajar bajne se dhokaa khaa ga.e Haa.e khawabon kee khayaabaan-saaziyaan Aankh kya kholee chaman murjhaa ga.e Kaun the aakhir jo manzil ke qareeb Aa.ine kee chaadaren phailaa ga.e Kis tajallee kaa diyaa ham ko fareb Kis dhundalke men hamen pahunchaa ga.e Un kaa aanaa hashr se Kuch kam na thaa Aur jab palTe qayaamat Dhaa ga.e Ik pahelee kaa hamen de kar javaab Ik pahelee ban ke har soo chhaa ga.e Phir vahee akhtar-shumaaree kaa nizaam Ham to is takraar se uktaa ga.e Rahnumaao raat abhee baaqee sahee Aaj sayyaare agar Takraa ga.e Kya rasaa niklee duaa-e-ijtihaad Wo chhupaate hee rahe ham paa ga.e Bas vahee memaar-e-fardaa hain 'nadeem' Jin ko mere valvale raas aa ga.e