qalam dil men duboyaa jaa raha hai
— Ahmad Nadeem Qasmi
Qalam dil men Duboyaa jaa raha hai
Nayaa manshoor likkhaa jaa raha hai
Main kashtee men akelaa to naheen hoon
Mire hamraah Dariya jaa raha hai
Salaamee ko jhuke jaate hain ashjaar
Havaa kaa ek jhonkaa jaa raha hai
Musaafir hee musaafir har taraf hain
Magar har shakhs tanhaa jaa raha hai
Main ik insaan hoon yaa saaraa jahaan hoon
Bagoola hai ki sahraa jaa raha hai
'nadeem' ab aamad aamad hai sahar kee
Sitaaron ko bujhaayaa jaa raha hai