qaraar e jaan bhi tumhii iztiraab e jaan bhi tumhii
— Ahmad Nadeem Qasmi
Qaraar-e-jaan bhee tumhee iztiraab-e-jaan bhee tumhee
Miraa yaqeen bhee tumhee ho miraa gumaan bhee tumhee
Tumhaaree jaan hai nik.hat tumhaaraa jism bahaar
Miree ghazal bhee tumhee meree daastaan bhee tumhee
Ye kya tilism hai Dariya men ban ke aks-e-qamar
Ruke hue bhee tumhee ho ravaan-davaan bhee tumhee
Khuda kaa shukr miraa raasta muayyan hai
Ki kaarvaan bhee tumhee meer-e-kaarvaan bhee tumhee
Tumhee ho jis se milee mujh ko shaan-e-istighnaa
Ki meraa gham bhee tumhee gham ke raaz-daan bhee tumhee
Nihaan ho zehn men vijdaan kaa dhuaan ban kar
Ufuq pe manzil-e-idraak kaa nishaan bhee tumhee
Tamaam husn-e-amal hon tamaam husn-e-bayaan
Ki meraa dil bhee tumhee ho miree zabaan bhee tumhee