shuuur men kabhi ehsaas men basaauun use
— Ahmad Nadeem Qasmi
Shu.oor men kabhi ehsaas men basaa.oon use
Magar main chaar taraf be-hijaab paa.oon use
Agarche fart-e-hayaa se nazar na aa.uun use
Wo rooth jaa.e to sau tarah se manaa.oon use
Taveel hijr kaa ye jabr hai ki sochtaa hoon
Jo dil men bastaa hai ab haath bhee lagaa.oon use
Use bulaa ke milaa umr bhar kaa sannaaTaa
Magar ye shauq ki ik baar phir bulaa.oon use
Andheree raat men jab raasta nahin miltaa
Main sochtaa hoon kahaan jaa ke DhoonD laa.oon use
Abhee tak us kaa tasavvur to mere bas men hai
Wo dost hai to khuda kis liye banaa.oon use
'nadeem' tark-e-mohabbat ko ek umr huee
Main ab bhee soch raha hoon ki bhuul jaaon use