tang aa jaate hain Dariya jo kuhistaanon men
— Ahmad Nadeem Qasmi
Tang aa jaate hain Dariya jo kuhistaanon men
Saans lene ko nikal jaate hain maidaanon men
Khair ho dasht-e-navardaan-e-mohabbat kee ab
Shahr baste chale jaate hain bayaabaanon men
Ab to le letaa hai baatin se yahee kaam junoon
Nazar aate naheen ab chaak garebaanon men
Maal choree kaa jo taqseem kiyaa choron ne
Nisf to baT gaya bastee ke nigahbaanon men
Kaun taareekh ke is sidq ko jhuTlaa.egaa
Khair-o-shar donon muqayyad rahe zindaanon men
Justujoo kaa koee anjaam to zaahir ho 'nadeem'
Ik musalmaan to nazar aa.e musalmaanon men