tuu bigadtaa bhi hai khaas apne hi andaaz ke saath

Too bigaDtaa bhee hai khaas apne hee andaaz ke saath Phuul khilte hain tire sho.ala-e-awaaz ke saath Ek baar aur bhee kyuun arz-e-tamannaa na karoon Ki too inkaar bhee kartaa hai ajab naaz ke saath Lai jo TuuTee to sadaa aa.ee shikast-e-dil kee Rag-e-jaan kaa koi rishta hai rag-e-saaz ke saath Too pukaare to chamak uThtee hain meree aankhen Teree soorat bhee hai shaamil tiree awaaz ke saath Jab tak arzaan hai zamaane men kabootar kaa lahoo Zulm hai rabt rakhoon gar kisee shahbaaz ke saath Past itnee to na thee meree shikast ai yaaro Par sameTe hain magar hasrat parvaaz ke saath Pahre baiThe hain qafas par ki hai sayyaad ko vahm Par-shikaston ko bhee ik rabt hai parvaaz ke saath Umr bhar sang-zanee karte rahe ahl-e-vatan Ye alag baat ki dafnaa.enge e.azaaz ke saath