wo jo ik umr se masruuf ibaadaat men the
— Ahmad Nadeem Qasmi
Wo jo ik umr se masroof ibaadaat men the
Aankh kholee to abhee arsa-e-zulmaat men the
Sirf aafaat na thiin zaat-e-ilaahee kaa suboot
Phuul bhee dasht men the hashr bhee jazbaat men the
Na ye taqdeer kaa likhaa thaa na manshaa-e-khuda
Haadse mujh pe jo guzre mire haalaat men the
Main ne kee hadd-e-nazar paar to ye raaz khulaa
Aasmaan the to faqat mere khayaalaat men the
Mere dil par to gireen aable ban kar boonden
Kaun see yaad ke sahraa the jo barsaat men the
Is sabab se bhee to main qaabil-e-nafrat Thahraa
Jitne jauhar the mohabbat ke miree zaat men the
Sirf shaitaan hee na thaa munkir-e-takreem 'nadeem'
Arsh par jitne farishte the miree ghaat men the