yuun to is jalva gah e husn men kya kya dekhaa

Yuun to is jalva-gah-e-husn men kya kya dekhaa Jab tujhe dekh chuke koi na tujh saa dekhaa Jab tiree dhun men kaheen laala-e-sahraa dekhaa Ham ye samjhe ki tiraa naqsh-e-kaf-e-paa dekhaa Taare TuuTe to fazaa men tiree aahaT goonjee Chaand niklaa to tiraa chehra-e-zebaa dekhaa Shahr-e-aghyaar sahee itnee khushee kya kam hai Ham ne dekhaa tujhe aur anjuman-aaraa dekhaa Ham ko Thukraa ke Kuch aise tire tevar badle Jab sar-e-bazm bhee dekhaa tujhe tanhaa dekhaa Ham to samjhe the qayaamat hai firaaq-e-mahboob Tujh se mil kar bhee magar hashr hee barpaa dekhaa Sub.h jab dhoop ke chashme se nahaa kar niklee Ham ne aa.eena badal teraa saraapaa dekhaa Bijliyaan ab to tire abr-e-karam kee barsen Umr-bhar apne sulagte kaa tamaashaa dekhaa Ham jo bhaTke bhee to kis shaan-e-wafa se bhaTke Ham ne har laghzish-e-paa men tiraa iimaa dekhaa Ham ba-een teera-naseebee na bane teera-nazar Ham ne har raat kee chitvan men sitaaraa dekhaa Teree qudrat kee siyaasat na samajh men aa.ee Haram-o-dair ko har daur men yakjaa dekhaa Aankh kholee to jahaan kaan-e-javaahar thaa 'nadeem' Haath phailaa.e to har chiiz ko anqaa dekhaa