aankhon se ayaan zakhm ki gahraaii to ab hai

Aankhon se ayaan zakhm kee gahraa.ee to ab hai Ab aa bhee chuko vaqt-e-maseehaa.ee to ab hai Pahle gham-e-furqat ke ye tevar to naheen the Rag rag men utartee huee tanhaa.ee to ab hai Taaree hai tamannaaon pe sakraat kaa aalam Har saans rifaaqat kee tamannaa.ee to ab hai Kal tak miree vahshat se faqat tum hee the aagaah Har gaam pe andesha-e-rusvaa.ee to ab hai Kya jaane mahaktee huee sub.hon men koee dil Shaamon men kisee dard kee ra.anaa.ee to ab hai Dil-soz ye taare hain to jaan-soz ye mahtaab Dar-asal shab-e-anjuman-aaraa.ee to ab hai Saf-basta hain har moD pe Kuch sang-ba-kaf log Ai zakhm-e-hunar lutf-e-pazeeraa.ee to ab hai