chhote chhote kaii be faiz mafaadaat ke saath
— Aitbar Sajid
ChhoTe chhoTe ka.ee be-faiz mafaadaat ke saath
Log zinda hain ajab soorat-e-haalaat ke saath
Faisla ye to bahar-haal tujhe karnaa hai
Zehn ke saath sulagnaa hai ki jazbaat ke saath
Guftugoo der se jaaree hai nateeje ke baghair
Ik na.ee baat nikal aatee hai har baat ke saath
Ab ke ye soch ke tum zakhm-e-judaa.ee denaa
Dil bhee bujh jaa.egaa Dhaltee huee is raat ke saath
Tum vahee ho ki jo pahle the miree nazron men
Kya izaafa huaa in atlas o baanaat ke saath
Itnaa paspaa na ho deevaar se lag jaa.egaa
Itne samjhaute na kar soorat-e-haalaat ke saath
Bhejtaa rahtaa hai gum-naam khaton men Kuch phuul
Is qadar kis ko mohabbat hai miree zaat ke saath