chhote chhote se mafaadaat liye phirte hain
— Aitbar Sajid
ChhoTe chhoTe se mafaadaat liye phirte hain
Dar-ba-dar khud ko jo din raat liye phirte hain
Apnee majrooh anaaon ko dilaase de kar
Haath men kaasa-e-khairaat liye phirte hain
Shahr men ham ne sunaa hai ki tire shola-navaa
Kuch sulagte hue naghmaat liye phirte hain
Mukhtalif apnee kahaanee hai zamaane bhar se
Munfarid ham gham-e-haalaat liye phirte hain
Ek ham hain ki gham-e-dahr se fursat hee naheen
Ek wo hain ki gham-e-zaat liye phirte hain