jo khayaal the na qayaas the vahii log mujh se bichhad gae

Jo khayaal the na qayaas the vahee log mujh se bichhaD ga.e Jo mohabbaton kee asaas the vahee log mujh se bichhaD ga.e Jinhen maantaa hee nahin ye dil vahee log mere hain ham-safar Mujhe har tarah se jo raas the vahee log mujh se bichhaD ga.e Mujhe lamha-bhar kee rafaaqaton ke saraab aur sataa.enge Miree umr-bhar kee jo pyaas the vahee log mujh se bichhaD ga.e Ye khayaal saare hain aarzee ye gulaab saare hain kaaghzee Gul-e-aarzoo kee jo baas the vahee log mujh se bichhaD ga.e Jinhen kar sakaa na qubool main wo shareek-e-raah-e-safar hue Jo miree talab miree aas the vahee log mujh se bichhaD ga.e Miree dhaDkanon ke qareeb the miree chaah the miraa khvaab the Wo jo roz-o-shab mire paas the vahee log mujh se bichhaD ga.e