kahaa din ko bhi ye ghar kis liye viiraan rahtaa hai

Kahaa din ko bhee ye ghar kis liye veeraan rahtaa hai Yahaan kya ham saa koi be-sar-o-saamaan rahtaa hai Dar-o-deevaar sannaaTe kee chaadar men hain khvaabeeda Bhalaa aisi jagah zinda koi insaan rahtaa hai Musalsal poochhne par ek chilman se javaab aayaa Yahaan ik dil-shikasta saahab-e-deevaan rahtaa hai Jhijak kar main ne poochhaa kya kabhi baahar nahin aataa Javaab aayaa use khalvat men itmeenaan rahtaa hai Kahaa kya us ke rishta-daar bhee milne nahin aate Javaab aayaa ye sahraa raat-din sunsaan rahtaa hai Kahaa koi to hogaa us ke dukh-sukh baanTne vaalaa Javaab aayaa nahin khaalee ye ghar ye lawn rahtaa hai Kahaa is ghar ke aangan men hain kuch phoolon ke paude bhee Javaab aayaa ki khaalee phir bhee har gul-daan rahtaa hai Kahaa kya is mohalle men nahin pursaan-e-haal us kaa Javaab aayaa khayaal us kaa mujhe har aan rahtaa hai Khuda kaa shukr hai ham ik fazaa men saans lete hain Agar milte nahin itnaa to itmeenaan rahtaa hai