kisi ne dil ke taaq par jalaa ke rakh diyaa hamen
— Aitbar Sajid
Kisee ne dil ke taaq par jalaa ke rakh diyaa hamen
Magar havaa-e-hijr ne bujhaa ke rakh diyaa hamen
Hazaar ham ne zabt se liyaa thaa kaam kya karen
Kisee ke aansuon ne phir rulaa ke rakh diyaa hamen
Hamaaree shohraten kharaab is tarah bhee us ne kiin
Ki apne aashnaaon se milaa ke rakh diyaa hamen
Hamen is anjuman men jaane us ne kyuun bulaa liyaa
Bulaa liyaa aur ik taraf biThaa ke rakh diyaa hamen
Faqat ham ek dekhne kee chiiz ban ke rah ga.e
Kisee ne aisa ishq men banaa ke rakh diyaa hamen
Ham 'e.atibaar' us kee har shikast men shareek the
Magar bisaat se alag uThaa ke rakh diyaa hamen