miraa hai kaun dushman meri chaahat kaun rakhtaa hai

Miraa hai kaun dushman meree chaahat kaun rakhtaa hai Isee par sochte rehne kee fursat kaun rakhtaa hai Makeenon ke ta.alluq hee se yaad aatee hai har bastee Vagarna sirf baam-o-dar se ulfat kaun rakhtaa hai Nahin hai nirkh koi mere in ash.aar-e-taaza kaa Ye mere khvaab hain khawabon kee qeemat kaun rakhtaa hai Dar-e-khema khulaa rakkhaa hai gul kar ke diyaa ham ne So izn-e-aam hai lo shauq-e-rukhsat kaun rakhtaa hai Mare dushman kaa qad is bhiiD men mujh se to oonchaa ho Yahee men DhoonDhtaa hoon aisi qaamat kaun rakhtaa hai Hamaare shahr kee raunaq hai kuch mash.hoor logon se Magar sab jaante hain kaisee shohrat kaun rakhtaa hai