muhtaaj ham safar ki masaafat na thii mirii
— Aitbar Sajid
Muhtaaj ham-safar kee masaafat na thee miree
Sab saath the kisee se rifaaqat na thee miree
Haq kis se maangtaa ki makeenon ke saath saath
Deevaar-o-baam-o-dar ko zaroorat na thee miree
Sach bol ke bhee dekh liyaa un ke saamne
Lekin unhen pasand sadaaqat na thee miree
Main jin pe mar miTaa thaa wo kaaghaz ke phuul the
Rasmee mukaalme the mohabbat na thee miree
Jo doosron ke dukh the vahee mere dukh bhee the
Kuch aisi mukhtalif bhee hikaayat na thee miree
Bas Kuch usuul the jo ba-har-haal the aziiz
Jaanam kisee se varna adaavat na thee miree