mujh se mukhlis thaa na vaaqif mire jazbaat se thaa
— Aitbar Sajid
Mujh se mukhlis thaa na vaaqif mire jazbaat se thaa
Us kaa rishta to faqat apne mafaadaat se thaa
Ab jo bichhDaa hai to kya ro.en judaa.ee pe tiree
Yahee andesha hamen pahlee mulaaqaat se thaa
Dil ke bujhne kaa havaaon se gilaa kya karnaa
Ye diyaa naza.a ke aalam men to kal raat se thaa
Markaz-e-shahr men rehne pe musir thee khilqat
Aur main vaabasta tire dil ke mazaafaat se thaa
Main kharaabon kaa makeen aur ta.alluq meraa
Tere naate kabhee khawabon ke mahallaat se thaa
Lab-kushaa.ee pe khulaa us ke sukhan se iflaas
Kitnaa aaraasta wo atlas-o-baanaat se thaa