mujhe aisa lutf ataa kiyaa ki jo hijr thaa na visaal thaa
— Aitbar Sajid
Mujhe aisa lutf ataa kiyaa ki jo hijr thaa na visaal thaa
Mire mausamon ke mizaaj-daan tujhe meraa kitnaa khayaal thaa
Kisee aur chehre ko dekh kar tiree shakl zehn men aa ga.ee
Tiraa naam le ke milaa use mere haafize kaa ye haal thaa
Kabhi mausamon ke saraab men kabhi baam-o-dar ke azaab men
Vahaan umr ham ne guzaar dee jahaan saans lenaa muhaal thaa
Kabhi too ne ghaur nahin kiyaa ki ye log kaise ujaD ga.e
Koi 'meer' jaisaa girafta-dil tere saamne kee misaal thaa
Tire ba.ad koi nahin milaa jo ye haal dekh ke poochhtaa
Mujhe kis kee aag jalaa ga.ee mire dil ko kis kaa malaal thaa
Kaheen khoon-e-dil se likhaa to thaa tire saal-e-hijr kaa saaneha
Wo adhooree Diary kho ga.ee wo na-jaane kaun saa saal thaa