mujhe wo kunj e tanhaaii se aakhir kab nikaalegaa
— Aitbar Sajid
Mujhe wo kunj-e-tanhaa.ee se aakhir kab nikaalegaa
Akele-pan kaa ye ehsaas mujh ko maar Daalegaa
Kisee ko kya paDee hai meree khaatir khud ko zahmat de
Pareshaan hain sabhee kaise koi mujh ko sambhaalegaa
Abhee taareekh naamee ek jaadoogar ko aanaa hai
Jo zinda shahr aur ajsaam ko patthar men Dhaalegaa
Bas agle moD par manzil tiree aane hee vaalee hai
Mire ai ham-safar too kitnaa meraa dukh baTaa legaa
Shareek-e-ranj kya karnaa use takleef kya denee
Ki jitnee der baiThegaa vahee baaten nikaalegaa
Rihaa kar de qafas kee qaid se ghaayal parinde ko
Kisee ke dard ko is dil men kitne saal paalegaa