na gumaan maut kaa hai na khayaal zindagii kaa
— Aitbar Sajid
Na gumaan maut kaa hai na khayaal zindagee kaa
So ye haal in dinon hai mire dil kee be-kasee kaa
Main shikasta baam o dar men jise jaa ke DhoonDtaa thaa
Koee yaad thee kisee kee koee naam thaa kisee kaa
Main havaaon se hiraasaan wo ghuTan se dil-girafta
Main charaagh teergee kaa wo gulaab raushnee kaa
Abhee rail ke safar men hain bahut nihaal donon
Kaheen rog ban na jaa.e yahee saath do ghaDee kaa
Koee shahr aa raha hai to ye khauf aa raha hai
Koee jaane kab utar le ki bharosa kya kisee kaa
Koee mukhtalif naheen hai ye dhuaan ye raa.egaanee
Ki jo haal shahr kaa hai vahee apnee shaa.iree kaa