phuulon men wo khushbuu wo sabaahat nahin aaii

Phoolon men wo khushboo wo sabaahat naheen aa.ee Ab tak tire aane kee shahaadat naheen aa.ee Mausam thaa numaa.ish kaa magar aankh na kholee Jaanaan tire zakhmon ko siyaasat naheen aa.ee Jo ruuh se aazaar kee maanind lipaT jaa.e Ham par wo ghaDee ai shab-e-vahshat naheen aa.ee Ai dasht-e-anal-haq tire qurbaan abhee tak Wo manzil iz.haar-e-sadaaqat naheen aa.ee Ham log ki hain maaon se bichhDe hue bachche Hisse men kisee ke bhee mohabbat naheen aa.ee Ham ne to bahut harf tiree mad.h men soche Afsos ki sunvaa.ee kee naubat naheen aa.ee Larze bhee naheen shahr ke hassaas dar-o-baam Dil raakh hue phir bhee qayaamat naheen aa.ee 'saajid' wo sahar jis ke liye raat bhee roee Aa.ee to sahee hasb-e-zaroorat naheen aa.ee