raste kaa intikhaab zaruurii saa ho gaya
— Aitbar Sajid
Raste kaa intikhaab zarooree saa ho gaya
Ab ikhtitaam-e-baab zarooree saa ho gaya
Ham chup rahe to aur bhee ilzaam aa.egaa
Ab Kuch na Kuch javaab zarooree saa ho gaya
Ham Taalte rahe ki ye naubat na aane paa.e
Phir hijr kaa azaab zarooree saa ho gaya
Har shaam jald sone kee aadat hee paD ga.ee
Har raat ek khvaab zarooree saa ho gaya
Aahon se TooTtaa naheen ye gumbad-e-siyaah
Ab sang-e-aaftaab zarooree saa ho gaya
Denaa hai imtihaan tumhaare firaaq kaa
Ab sabr kaa nisaab zarooree saa ho gaya