tire jaisaa meraa bhi haal thaa na sukuun thaa na qaraar thaa
— Aitbar Sajid
Tire jaisaa meraa bhee haal thaa na sukoon thaa na qaraar thaa
Yahee 'umr thee mire ham-nasheen ki kisee se mujh ko bhee pyaar thaa
Main samajh raha hoon tiree kasak tiraa meraa dard hai mushtarak
Isee gham kaa too bhee asiir hai isee dukh kaa main bhee shikaar thaa
Faqat ek dhun thee ki raat-din isee khvaab-zaar men gum rahen
Wo suroor aisa suroor thaa wo khumaar aisa khumaar thaa
Kabhi lamha-bhar kee bhee guftugoo miree us ke saath na ho sakee
Mujhe fursaten nahin mil sakeen wo havaa ke rath pe savaar thaa
Ham 'ajeeb tarz ke log the ki hamaare aur hee rog the
Main khizaan men us kaa thaa muntazir use intizaar-e-bahaar thaa
Use paDh ke tum na samajh sake ki miree kitaab ke ruup men
Koi qarz thaa ka.ee saal kaa ka.ee rat-jagon kaa udhaar thaa