apne pahluu se wo gairon ko uthaa hi na sake

Apne pahloo se wo ghairon ko uThaa hee na sake Un ko ham qissa-e-gham apna sunaa hee na sake Zehn meraa wo qayaamat ki do-aalam pe muheet Aap aise ki mire zehn men aa hee na sake Dekh lete jo unhen to mujhe rakhte ma.azoor Shaikh-saahib magar us bazm men jaa hee na sake Aql mahngee hai bahut ishq khilaaf-e-tahzeeb Dil ko is ahd men ham kaam men laa hee na sake Ham to khud chaahte the chain se baiThen koi dam Aap kee yaad magar dil se bhulaa hee na sake Ishq kaamil hai usee kaa ki patangon kee tarah Taab nazzaara-e-ma.asooq kee laa hee na sake Daam-e-hastee kee bhee tarkeeb ajab rakkhee hai Jo phanse us men wo phir jaan bachaa hee na sake Maz.har-e-jalva-e-jaanaan hai har ik shai 'akbar' Be-adab aankh kisee samt uThaa hee na sake Aisi mantiq se to deevaangee behtar 'akbar' Ki jo khaaliq kee taraf dil ko jhukaa hee na sake