charkh se Kuch umiid thii hi nahin
— Akbar Allahabadi
Charkh se Kuch umiid thee hee naheen
Aarzoo main ne koee kee hee naheen
Maz.habee bahas main ne kee hee naheen
Faaltoo aql mujh men thee hee naheen
Chaahtaa thaa bahut see baaton ko
Magar afsos ab wo jee hee naheen
Jur.at-e-arz-e-haal kya hotee
Nazar-e-lutf us ne kee hee naheen
Is museebat men dil se kya kahtaa
Koee aisi misaal thee hee naheen
Aap kya jaanen qadr-e-yaa-allaah
Jab museebat koee paDee hee naheen
Shirk chhoDaa to sab ne chhoD diyaa
Meree koee society hee naheen
Poochhaa 'akbar' hai aadmee kaisaa
Hans ke bole wo aadmee hee naheen