dil miraa jis se bahaltaa koi aisa na milaa

Dil miraa jis se bahaltaa koee aisa na milaa But ke bande mile allaah kaa bandaa na milaa Bazm-e-yaaraan se phiree baad-e-bahaaree maayoos Ek sar bhee use aamaada-e-sauda na milaa Gul ke khvaahaan to nazar aa.e bahut itr-farosh Taalib-e-zamzama-e-bulbul-e-shaidaa na milaa Vaah kya raah dikhaa.ee hai hamen murshid ne Kar diyaa kaabe ko gum aur kaleesaa na milaa Rang chehre kaa to collage ne bhee rakkhaa qaa.im Rang-e-baatin men magar baap se beTaa na milaa Sayyad uTThe jo gazette le ke to laakhon laa.e Shaikh qur.aan dikhaate phire paisaa na milaa Hoshyaaron men to ik ik se sivaa hain 'akbar' Mujh ko deevaanon men lekin koee tujh saa na milaa