falsafii ko bahs ke andar khuda miltaa nahin

Falsafee ko bahs ke andar khuda miltaa nahin Dor ko suljhaa raha hai aur siraa miltaa nahin Ma.arifat khaaliq kee aalam men bahut dushvaar hai Shahr-e-tan men jab ki khud apna pataa miltaa nahin Ghaafilon ke lutf ko kaafee hai duniyaavee khushee Aaqilon ko be-gham-e-uqbaa mazaa miltaa nahin Kashti-e-dil kee ilaahee bahr-e-hastee men ho khair Naakhudaa milte hain lekin baa-khuda miltaa nahin Ghaafilon ko kya sunaa.oon daastaan-e-ishq-e-yaar Sunne vaale milte hain dard-aashnaa miltaa nahin Zindagaanee kaa mazaa miltaa thaa jin kee bazm men Un kee qabron kaa bhee ab mujh ko pataa miltaa nahin Sirf zaahir ho gaya sarmaaya-e-zeb-o-safaa Kya ta.ajjub hai jo baatin baa-safaa miltaa nahin Pukhta tabaon par havaadis kaa nahin hota asar Kohsaaron men nishaan-e-naqsh-e-paa miltaa nahin Shaikh-saahib barhaman se laakh barten dostee Be-bhajan gaa.e to mandir se Tikaa miltaa nahin Jis pe dil aayaa hai wo sheereen-adaa miltaa nahin Zindagee hai talkh jiine kaa mazaa miltaa nahin Log kahte hain ki bad-naamee se bachnaa chaahiye Keh do be us ke javaanee kaa mazaa miltaa nahin Ahl-e-zaahir jis qadar chaahen karen bahs-o-jidaal Main ye samjhaa hoon khudee men to khuda miltaa nahin Chal base wo din ki yaaron se bharee thee anjuman Haa.e afsos aaj soorat-aashnaa miltaa nahin Manzil-e-ishq-o-tavakkul manzil-e-ezaaz hai Shaah sab baste hain yaan koi gadaa miltaa nahin Baar takleefon kaa mujh par baar-e-ehsaan se hai sahl Shukr kee jaa hai agar haajat-ravaa miltaa nahin Chaandnee raaten bahaar apnee dikhaatee hain to kya Be tire mujh ko to lutf ai mah-laqaa miltaa nahin Ma.anee-e-dil kaa kare iz.haar 'akbar' kis tarah Lafz mauzoon bahr-e-kashf-e-mudda.aa miltaa nahin