gale lagaaen karen tum ko pyaar eid ke din
— Akbar Allahabadi
Gale lagaa.en karen tum ko pyaar eid ke din
Idhar to aao mire gul-ezaar eid ke din
Ghazab kaa husn hai aaraa.ishen qayaamat kee
Ayaan hai qudrat-e-parvardigaar eid ke din
Sanbhal sakee na tabee.at kisee tarah meree
Raha na dil pe mujhe ikhtiyaar eid ke din
Wo saal bhar se kudoorat bharee jo thee dil men
Wo duur ho ga.ee bas ek baar eid ke din
Lagaa liyaa unhen siine se josh-e-ulfat men
Gharaz ki aa hee gaya mujh ko pyaar eid ke din
Kaheen hai naghma-e-bulbul kaheen hai khanda-e-gul
Ayaan hai josh-e-shabaab-e-bahaar eid ke din
Sivayyaan duudh shakar meva sab muhayyaa hai
Magar ye sab hai mujhe naagavaar eid ke din
Mile agar lab-e-sheereen kaa tere ik bosa
To lutf ho mujhe albatta yaar eid ke din