hoon main parvaana magar shama to ho raat to ho

Hoon main parvaana magar sham.a to ho raat to ho Jaan dene ko hoon maujood koee baat to ho Dil bhee haazir sar-e-tasleem bhee kham ko maujood Koee markaz ho koee qibla-e-haajaat to ho Dil to bechain hai iz.haar-e-iraadat ke liye Kisee jaanib se Kuch iz.haar-e-karaamaat to ho Dil-kushaa baada-e-saafee kaa kise zauq naheen Baatin-afroz koee peer-e-kharaabaat to ho Guftanee hai dil-e-pur-dard kaa qissa lekin Kis se kahiye koee mustafsir-e-haalaat to ho Daastaan-e-gham-e-dil kaun kahe kaun sune Bazm men mauqa-e-iz.haar-e-khayaalaat to ho Vaade bhee yaad dilaate hain gile bhee hain bahut Wo dikhaa.ee bhee to den un se mulaaqaat to ho Koee vaa.iz naheen fitrat se balaaghat men sivaa Magar insaan men Kuch fahm-e-ishaaraat to ho