jab yaas huii to aahon ne siine se nikalnaa chhod diyaa

Jab yaas huee to aahon ne siine se nikalnaa chhoD diyaa Ab khushk-mizaaj aankhen bhee huiin dil ne bhee machalnaa chhoD diyaa Naavak-faganee se zaalim kee jangal men hai ik sannaaTaa saa Murghaan-e-khush-ilhaan ho ga.e chup aahoo ne uchhalnaa chhoD diyaa Kyuun kibr-o-ghuroor is daur pe hai kyuun dost falak ko samjhaa hai Gardish se ye apnee baaz aayaa yaa rang badalnaa chhoD diyaa Badlee wo havaa guzraa wo samaan wo raah nahin wo log nahin Tafreeh kahaan aur sair kujaa ghar se bhee nikalnaa chhoD diyaa Wo soz-o-gudaaz us mahfil men baaqee na raha andher huaa Parvaanon ne jalnaa chhoD diyaa sham'on ne pighalnaa chhoD diyaa Har gaam pe chand aankhen nigaraan har moD pe ik licence-talab Us park men aakhir ai 'akbar' main ne to Tahalnaa chhoD diyaa Kya diin ko quvvat den ye javaan jab hausla-afzaa koi nahin Kya hosh sanbhaalen ye laDke khud us ne sanbhalnaa chhoD diyaa Iqbaal musaa'id jab na raha rakkhe ye qadam jis manzil men Ashjaar se saaya duur huaa chashmon ne ubalnaa chhoD diyaa Allaah kee raah ab tak hai khulee aasaar-o-nishaan sab qaa.em hain Allaah ke bandon ne lekin us raah men chalnaa chhoD diyaa Jab sar men havaa-e-taa.at thee sarsabz shajar ummeed kaa thaa Jab sar-sar-e-isyaan chalne lagee is peD ne phalnaa chhoD diyaa Us hoor-laqaa ko ghar laa.e ho tum ko mubaarak ai 'akbar' Lekin ye qayaamat kee tum ne ghar se jo nikalnaa chhoD diyaa