jahaan men haal miraa is qadar zabuun huaa
— Akbar Allahabadi
Jahaan men haal miraa is qadar zaboon huaa
Ki mujh ko dekh ke bismil ko bhee sukoon huaa
Ghareeb dil ne bahut aarzooen paidaa kiin
Magar naseeb kaa likkhaa ki sab kaa Khoon huaa
Wo apne husn se vaaqif main apnee 'aql se sair
Unhon ne hosh sambhaalaa mujhe junoon huaa
Umeed-e-chashm-e-muravvat kahaan rahi baaqee
Zareeya baaton kaa jab sirf telephone huaa
Nigaah-e-garm christmas men bhee rahi ham par
Hamaare haq men december bhee maah-e-june huaa