jazba e dil ne mire taasiir dikhlaaii to hai

Jazba-e-dil ne mire taaseer dikhlaa.ee to hai Ghungrooon kee jaanib-e-dar Kuch sadaa aa.ee to hai 'ishq ke iz.haar men har-chand rusvaa.ee to hai Par karoon kya ab tabee'at aap par aa.ee to hai Aap ke sar kee qasam mere sivaa koi nahin Be-takalluf aa.iye kamre men tanhaa.ee to hai Jab kahaa main ne taDaptaa hai bahut ab dil miraa Hans ke farmaayaa taDaptaa hogaa saudaai to hai Dekhiye hotee hai kab raahee soo-e-mulk-e-adam Khaana-e-tan se hamaaree ruuh ghabraa.ee to hai Dil dhaDaktaa hai miraa luun bosa-e-rukh yaa na luun Niind men us ne dulaa.ee munh se sarkaa.ee to hai Dekhiye lab tak nahin aatee gul-e-aariz kee yaad Sair-e-gulshan se tabee'at ham ne bahlaa.ee to hai Main balaa men kyuun phansoon deevaana ban kar us ke saath Dil ko vahshat ho to ho kambakht saudaai to hai Khaak men dil ko milaayaa jalva-e-raftaar se Kyuun na ho ai naujavaan ik shaan-e-raa'naa.ee to hai Yuun muravvat se tumhaare saamne chup ho rahen Kal ke jalson kee magar ham ne khabar paa.ee to hai Baada-e-gul-rang kaa saaghar 'inaayat kar mujhe Saaqiyaa taakheer kya hai ab ghaTaa chhaa.ee to hai Jis kee ulfat par baDaa daa'vaa thaa kal 'akbar' tumhen Aaj ham jaa kar use dekh aa.e harjaa.ee to hai