kahaan wo ab lutf e baahamii hai mohabbaton men bahut kamii hai

Kahaan wo ab lutf-e-baahamee hai mohabbaton men bahut kamee hai Chalee hai kaisee havaa ilaahee ki har tabee.at men barhamee hai Miree wafa men hai kya tazalzul miree itaa.at men kya kamee hai Ye kyuun nigaahen phiree hain mujh se mizaaj men kyuun ye barhamee hai Vahee hai fazl-e-khuda se ab tak taraqqi-e-kaar-e-husn o ulfat Na wo hain mashq-e-sitam men qaasir na khoon-e-dil kee yahaan kamee hai Ajiib jalve hain hosh-dushman ki vahm ke bhee qadam ruke hain Ajiib manzar hain hairat-afzaa nazar jahaan thee vaheen thamee hai Na koi takreem-e-baahamee hai na pyaar baaqee hai ab dilon men Ye sirf tahreer men Dear sir hai yaa janaab-e-mukarramee hai Kahaan ke muslim kahaan ke hindoo bhulaa.ee hain sab ne aglee rasmen Aqeede sab ke hain teen-terah na gyaarahveen hai na ashTamee hai Nazar miree aur hee taraf hai hazaar rang-e-zamaana badle Hazaar baaten banaa.e naaseh jamee hai dil men jo Kuch jamee hai Agarche main rind-e-mohtaram hoon magar ise shaikh se na poochho Ki un ke aage to is zamaane men saaree Dunya jahannamee hai