na bahte ashk to taasiir men sivaa hote
— Akbar Allahabadi
Na bahte ashk to taaseer men sivaa hote
Sadaf men rahte ye motee to be-bahaa hote
Mujh aise rind se rakhte zaroor hee ulfat
Janaab-e-shaikh agar aashiq-e-khuda hote
Gunaahgaaron ne dekhaa jamaal-e-rahmat ko
Kahaan naseeb ye hota jo be-khataa hote
Janaab-e-hazrat-e-naaseh kaa vaah kya kahnaa
Jo ek baat na hotee to auliyaa hote
Mazaaq-e-ishq naheen shekh men ye hai afsos
Ye chaashnee bhee jo hotee to kya se kya hote
Mahall-e-shukr hain 'akbar' ye darafshaan nazmen
Har ik zabaan ko ye motee naheen ataa hote