na haasil huaa sabr o aaraam dil kaa
— Akbar Allahabadi
Na haasil huaa sabr-o-aaraam dil kaa
Na niklaa kabhi tum se Kuch kaam dil kaa
Mohabbat kaa nashsha rahe kyuun na har-dam
Bharaa hai mai-e-ishq se jaam dil kaa
Phansaayaa to aankhon ne daam-e-balaa men
Magar ishq men ho gaya naam dil kaa
Huaa khvaab rusvaa ye ishq-e-butaan men
Khuda hee hai ab mere badnaam dil kaa
Ye baankee adaa.en ye tirchhee nigaahen
Yahee le ga.iin sabr-o-aaraam dil kaa
Dhuaan pahle uThtaa thaa aaghaaz thaa wo
Huaa khaak ab ye hai anjaam dil kaa
Jab aaghaaz-e-ulfat hee men jal raha hai
To kya khaak batlaa.oon anjaam dil kaa
Khuda ke liye pher do mujh ko saahab
Jo sarkaar men Kuch na ho kaam dil kaa
Pas-e-marg un par khulaa haal-e-ulfat
Ga.ee le ke ruuh apnee paighaam dil kaa
TaDaptaa huaa yuun na paayaa hamesha
Kahoon kya main aaghaaz-o-anjaam dil kaa
Dil us be-wafa ko jo dete ho 'akbar'
To Kuch soch lo pahle anjaam dil kaa