na ruuh e mazhab na qalb e aarif na shaairaana zabaan baaqii
— Akbar Allahabadi
Na rooh-e-maz.hab na qalb-e-aarif na shaa.iraana zabaan baaqee
Zameen hamaaree badal ga.ee hai agarche hai aasmaan baaqee
Shab-e-guzishta ke saaz o saamaan ke ab kahaan hain nishaan baaqee
Zabaan-e-shama-e-sahar pe hasrat kee rah ga.ee daastaan baaqee
Jo zikr aataa hai aakhirat kaa to aap hote hain saaf munkir
Khuda kee nisbat bhee dekhtaa hoon yaqeen rukhsat gumaan baaqee
Fuzool hai un kee bad-dimaaghee kahaan hai fariyaad ab labon par
Ye vaar par vaar ab abas hain kahaan badan men hai jaan baaqee
Main apne miTne ke gham men naalaan udhar zamaana hai shaad o khandaan
Ishaara kartee hai chashm-e-dauraan jo aan baaqee jahaan baaqee
Isee liye rah ga.ee hain aankhen ki mere miTne kaa rang dekhen
Sunoon wo baaten jo hosh uDaa.en isee liye hain ye kaan baaqee
Ta.ajjub aataa hai tifl-e-dil par ki ho gaya mast-e-nazm-e-'akbar'
Abhee middle paas tak naheen hai bahut se hain imtihaan baaqee