ab aa gaya hai jahaan men to muskuraataa jaa
— Ali Sardar Jafri
Ab aa gaya hai jahaan men to muskuraataa jaa
Chaman ke phuul dilon ke kanval khilaataa jaa
Adam hayaat se pahle adam hayaat ke ba.ad
Ye ek pal hai use jaavedaan banaataa jaa
BhaTak rahi hai andhere men zindagee kee baraat
Koi charaagh sar-e-rahguzar jalaataa jaa
Guzar chaman se misaal-e-naseem-e-sub.h-e-bahaar
Gulon ko chheD ke kaanTon ko gudgudaataa jaa
Rah-e-daraaz hai aur duur shauq kee manzil
Garaan hai marhala-e-umr giit gaataa jaa
Balaa se bazm men gar zauq-e-naghmagee kam hai
Navaa-e-talkh ko kuch talkh-tar banaataa jaa
Jo ho sake to badal zindagee ko khud varna
Nazhaad-e-nau ko tareeq-e-junoon sikhaataa jaa
Dikhaa ke jalva-e-fardaa banaa de deevaana
Na.e zamaane ke rukh se naqaab uThaataa jaa
Bahut dinon se dil-o-jaan kee mahfilen hain udaas
Koi taraana koi daastaan sunaataa jaa