aqiide bujh rahe hain sham e jaan gul hotii jaatii hai

Aqeede bujh rahe hain sham-e-jaan ghul hotee jaatee hai Magar zauq-e-junoon kee sho.ala-saamaanee naheen jaatee Khuda ma.aloom kis kis ke lahoo kee laala-kaaree hai Zameen-e-koo-e-jaanaan aaj pahchaanee naheen jaatee Agar yuun hai to kyuun hai yuun naheen to kyuun naheen aakhir Yaqeen mohkam hai lekin zid kee hairaanee naheen jaatee Lahoo jitnaa thaa saaraa sarf-e-maqtal ho gaya lekin Shaheedaan-e-wafa ke rukh kee taabaanee naheen jaatee Pareshaan-rozgaar aashufta-haalaan kaa muqaddar hai Ki us zulf-e-pareshaan kee pareshaanee naheen jaatee Har ik shai aur mahngee aur mahngee hotee jaatee hai Bas ik khoon-e-bashar hai jis kee arzaanee naheen jaatee Ye naghma naghma-e-bedaaree-e-jamhoor-e-aalam hai Wo shamsheer-e-navaa jis kee darakhshaanee naheen jaatee Na.e khawabon ke dil men sho.ala-e-khursheed-e-mahshar hai Zameer-e-hazrat-e-insaan kee sultaanee naheen jaatee Lagaate hain labon par mohr arbaab-e-zabaan-bandee Alee-'sardaar' kee shaan-e-ghazal-khvaanee naheen jaatee