chashma e bad mast ko phir sheva e dil daarii de
— Ali Sardar Jafri
Chashma-e-bad-mast ko phir sheva-e-dil-daaree de
Dil-e-aavaara ko paighaam-e-giraftaaree de
Ishq hai saada-o-maasoom use apnee tarah
Jauhar-e-tegh-e-adaa khanjar-e-ayyaaree de
Jo dukhe dil hain unhen daulat-e-darmaan ho ataa
Dard ke haath men mat kaasaa-e-naadaaree de
Kitnee farsooda hai ye jurm-o-sazaa kee Dunya
Sar-kashee dil ko nayaa zauq-e-gunahgaaree de
Shaakh-e-gul kab se hai siine men chhupaa.e hue gul
Dekhen kab baad-e-sabaa hukm-e-chaman-kaaree de
Ai mire sho.ala-e-dil sho.ala-e-sher-o-daanish
Raat aakhir hai use jashn-e-sharar-baaree de
Chaman afsurda hai ai jaan-e-chaman rooh-e-bahaar
Gul ko bhee apne tabassum kee fusoon-kaaree de