dil ki aag javaanii ke rukhsaaron ko dahkaae hai

Dil kee aag javaanee ke rukhsaaron ko dahkaa.e hai Bahe paseena mukhDe par yaa sooraj pighlaa jaa.e hai Man ik nanhaa saa baalak hai humak humak rah jaa.e hai Duur se mukh kaa chaand dikhaa kar kaun use lalchaa.e hai Mai hai teree aankhon men aur mujh pe nasha saa taaree hai Niind hai teree palkon men aur khvaab mujhe dikhlaa.e hai Tere qaamat kee larzish se mauj-e-mai men larzish hai Teree nigah kee mastee hee paimaanon ko chhalkaa.e hai Teraa dard salaamat hai to marne kee ummeed nahin Laakh dukhee ho ye Dunya rehne kee jagah ban jaa.e hai