farog e diida o dil laala e sahar ki tarah

Farogh-e-deeda-o-dil laala-e-sahar kee tarah Ujaalaa bin ke raho sham-e-rahguzar kee tarah Payambaron kee tarah se jiyo zamaane men Payaam-e-shauq bano daulat-e-hunar kee tarah Ye zindagee bhee koi zindagee hai ham-nafaso Sitaara ban ke jale bujh ga.e sharar kee tarah Daraa sakee na mujhe teergee zamaane kee Andheree raat se guzraa hoon main qamar kee tarah Samundaron ke talaatum ne mujh ko paalaa hai Chamak raha hoon isee vaaste guhar kee tarah Tamaam koh o tal o bahr o bar hain zer-e-nageen Khulaa huaa hoon main shaaheen ke baal-o-par kee tarah Tamaam daulat-e-kaunain hai khiraaj us kaa Ye dil nahin kisee luuTe hue nagar kee tarah Guzar ke khaar se ghunche se gul se shabnam se Main shaakh-e-vaqt men aayaa hoon ik samar kee tarah Main dil men talkhee-e-zahraab-e-gham bhee rakhtaa hoon Na misl-e-shahd hoon sheereen na main shakar kee tarah Khizaan ke dast-e-sitam ne mujhe chhuaa hai magar Tamaam sho.ala o shabnam hoon kaashmar kee tarah Miree navaa men hai lutf-o-suroor-e-sub.h-e-nashaat Har ek sher hai rindon kee shaam-e-tar kee tarah Ye faatehaana ghazal asr-e-nau kaa hai aahang Buland o past ko dekhaa hai deeda-var kee tarah