ham jo mahfil men tirii siina figaar aate hain
— Ali Sardar Jafri
Ham jo mahfil men tiree seena-figaar aate hain
Rang-bar-dosh gulistaan-ba-kanaar aate hain
Chaak-dil chaak-jigar chaak-garebaan vaale
Misl-e-gul aate hain maanind-e-bahaar aate hain
Koee ma.ashooq sazaavaar-e-ghazal hai shaayad
Ham ghazal le ke soo-e-shahr-e-nigaar aate hain
Kya vahaan koee dil-o-jaan kaa talabgaar naheen
Jaa ke ham koocha-e-qaatil men pukaar aate hain
Qaafile shauq ke rukte naheen deevaaron se
SainkaDon mahbas-o-zindaan ke dayaar aate hain
Manzilen dauD ke rahrav ke qadam letee hain
Bosa-e-paa ke liye raahguzaar aate hain
Khud kabhee mauj-o-talaatum se na nikle baahar
Paar jo saare zamaane ko utaar aate hain
Kam ho kyuun abroo-e-qaatil kee kamaanon kaa khinchaao
Jab sar-e-teer-e-sitam aap shikaar aate hain