kitnii aashaaon ki laashen suukhen dil ke aangan men

Kitnee aashaaon kee laashen sookhen dil ke aangan men Kitne sooraj Doob ga.e hain chehron ke peele-pan men Bachchon ke meeThe honTon par pyaas kee sookhee ret jamee Duudh kee dhaaren gaa.e ke than se gir ga.iin naagon ke phan men Registaanon men jalte hain paDe hue sau naqsh-e-qadam par Aaj khiraamaan koee naheen hai ummeedon ke gulshan men Chaknaa-choor huaa khawabon kaa dilkash dilchasp aa.eena TeDhee tirchhee tasveeren hain TooTe-phooTe darpan men Paa-e-junoon men paDee huee hain hirs-o-havaa kee zanjeeren Qaid hai ab tak haath sahar kaa taareekee ke kangan men Aankhon kee Kuch nauras kaliyaan neem-shagufta ghuncha-e-lab Kaise kaise phuul bhare hain gulcheenon ke daaman men Dast-e-ghaib kee tarah chhupaa hai zulm kaa haath sitam kaa vaar Khushk lahoo kee baarish dekhee ham ne koocha-e-barzan men